رمضان كريم
....
رمضان كريم الله أكرم
ندهة آدان مغربه أرحم
من نسمه بتهفهف وتفوت
برد وسلام على من أسلم
رمضان كريم الله أكرم
...
رمضان وحِس الشيخ رفعت
والنقشبندى صَدى الكروان
يا مصر يا مأمنه برفعة
المصطفى وحافظه القرآن
يا مُطمئنه بآلِ البيت
أنا يا حُسين زورت وصلّيت
شاهدت نور النبى وبكيت
أطعمنى أكرم من أطعم
رمضان كريم الله أكرم
...
رمضان وصلوات التراويح
وخلق سِمحه بتدعى الله
وقلبى دايب م التسابيح
مصابيح تنوّر للى هداه
يا مصر يا مَرسى الحيران
يا حتّه م الجنه ف رمضان
رمضان كريم إبنك إنسان
بيدعى بالاسم الاعظم
رمضان كريم الله أكرم
....
شعر ناصر رشوان
ليست هناك تعليقات:
إرسال تعليق